Og sígur enn!

9. október kl. 13.22

Jú, Sandskeiðið – það á Norðfjarðarvegi – er enn að síga til sjávar og slíta stykki úr veginum. Enn ein ástæða til að fagna nýju göngunum.

Veðurskipti

28. september kl. 16.36

Hætti að rigna um tvö og reif af. Sást til sólar upp úr þrjú og nú er glaðasólskin. E-en, Norðfjörðurinn er kolmórauður og það gutlar í grasflötum. Hellisfjörður og Viðfjörður, aldrei hef ég séð litaðan sjó úr þeim.

Horfið hús

27. september kl. 14.08

Nú er búið að rífa hússkömmina sem stóð milli núverandi vínbúðar/apóteks og Olís. Þá þarf maður ekki lengur að fara út á götu til að sjá hvaða umferð kemur að innan og hvort nokkur tími sé til að skondra yfir götuna eða inn á Olís.

Þvílík drift á karli!

27. september kl. 14.00

Að hreint út steingleyma að hafa blogg í eigin nafni lýsir manni ekki vel. Nújæja.

Fimm tímar eða fjórtán?

13. desember 2013

Svo sem sjá má ( http://www.ruv.is/frett/thurftu-ad-braeda-snjo-i-pottum ) var vatnslaust á Neskaupstað í vikunni í þetta fimm klukkustundir. Gúrkutíðarfrétt fyrir reykvíska, ætla ég, þó svo Reykjavík hefði hljómað eins og Rama í sömu sporum. Jæja, strump með það. Hitt vita aftur færri að yzt í bænum var vatnslaust í um fjórtán tíma svo þurfti að brjóta vakir til að fá vatn. Þetta er af fyrstu hendi, vel að merkja, þar sem ég mátti sækja vatn í Bakkalækinn morguninn eftir til að geta skolað niður úr klósettinu.

Engan súludans hér?

11. júlí 2013

pict0001.jpgSá þetta merki í gærdag þegar ég var á röltinu um bæinn. Sem vonlegt var varð ég allhissa, enda ekkert heyrt né séð um ný bannmerki. Pressan.is (q.v.) fann út hvað var á seyði. Mig hálfrámaði í að hafa heyrt í sjúkravélinni á Eistnaflugi í fyrra en hafði ekkert heyrt meira.

…finn ég neistann…

3. ágúst 2012

Jæjanú. Þá er Neistaflugið að bresta á af fullum þunga og ég kominn í bakkakommalitinn. Hugsa ég tölti inn í bæ í kvöld og hlusti ögn á Coney Island Babies.

Úr leirhúsinu…

3. ágúst 2012

Nú hefur það skeð sem ég hélt seint verða: Adobe Inc. hefur sent frá sér letur bundið OFL-leyfinu. Source Sans Pro er steinskrift í sex þykktum og eru þær allar í uppréttu og skáletri.
Sjá nánar: http://blogs.adobe.com/typblography/2012/08/source-sans-pro.html

Mjólkurpokar?

18. mars 2012

Áður en mjólkurbúið á Egilsstöðum fernuvæddist var mjólkin seld í pokum. Hvar annarsstaðar tíðkaðist það?

Á minni ævi man ég eftir einum jarðskjálfta sem ég fann sjálfur, og sá náði 2 á EMS98-kvarðanum. Sá átti að mig minnir upptök í Rósagarðinum.

Edit: Fann færslu um hann um daginn. Hann var að kvöldi 31. janúar 2005 á Jan Mayen-hryggnum.