Fimm tímar eða fjórtán?

13. desember 2013

Svo sem sjá má ( http://www.ruv.is/frett/thurftu-ad-braeda-snjo-i-pottum ) var vatnslaust á Neskaupstað í vikunni í þetta fimm klukkustundir. Gúrkutíðarfrétt fyrir reykvíska, ætla ég, þó svo Reykjavík hefði hljómað eins og Rama í sömu sporum. Jæja, strump með það. Hitt vita aftur færri að yzt í bænum var vatnslaust í um fjórtán tíma svo þurfti að brjóta vakir til að fá vatn. Þetta er af fyrstu hendi, vel að merkja, þar sem ég mátti sækja vatn í Bakkalækinn morguninn eftir til að geta skolað niður úr klósettinu.

Engan súludans hér?

11. júlí 2013

pict0001.jpgSá þetta merki í gærdag þegar ég var á röltinu um bæinn. Sem vonlegt var varð ég allhissa, enda ekkert heyrt né séð um ný bannmerki. Pressan.is (q.v.) fann út hvað var á seyði. Mig hálfrámaði í að hafa heyrt í sjúkravélinni á Eistnaflugi í fyrra en hafði ekkert heyrt meira.

…finn ég neistann…

3. ágúst 2012

Jæjanú. Þá er Neistaflugið að bresta á af fullum þunga og ég kominn í bakkakommalitinn. Hugsa ég tölti inn í bæ í kvöld og hlusti ögn á Coney Island Babies.

Mjólkurpokar?

18. mars 2012

Áður en mjólkurbúið á Egilsstöðum fernuvæddist var mjólkin seld í pokum. Hvar annarsstaðar tíðkaðist það?

Á minni ævi man ég eftir einum jarðskjálfta sem ég fann sjálfur, og sá náði 2 á EMS98-kvarðanum. Sá átti að mig minnir upptök í Rósagarðinum.

Edit: Fann færslu um hann um daginn. Hann var að kvöldi 31. janúar 2005 á Jan Mayen-hryggnum.

Tiltikin skróggari

16. júlí 2011

Gamli Jón sagði svo: “Íslenska sauðféð er svo feitt að fimmtíu merkur af mör er ekki sjaldséð og sextíu merkur sæjust, en þá væri mörinn svo meyr að þyrfti að ausa honum úr belgnum.”

Tuttugu tímar af þögn

4. júlí 2011

Jamm, útvarp allra landsmanna heyrðist loks aftur á FM austanlands skömmu fyrir kl. 11. Langbylgjan var í lagi allan tímann sem betur fer, en þvílíkt Ramakvein sem orðið hefði, hefðu sendarnir þagnað suðvestanlands.

Eins og svo oft áður, voru Bylgjan og 957 í loftinu á FM nær allan tímann.

Þunnt hljóð í lofti

3. júlí 2011

Það fyrsta sem ég sá um útvarps- og sjónvarpsleysið hér fyrir austan var frétt á ruv.is nær fjórum tímum eftir að allt datt út.

Djók… eða hvað?

24. nóvember 2010

Einn daginn ákváðu Bill Gates, Steve Jobs og Linus Torvalds að slíðra sverðin og fara út á vatn að veiða bassa. Eins og stundum er siður hjá Kananum, höfðu þeir með sér hálfan hafsjó af bjórlapi.
Eftir drykklanga stund varð Linus Torvalds mál. Hann stökk út úr bátnum, hljóp í land, mé stórri bunu og hljóp út í bátinn aftur.
Nokkru síðar varð Steve Jobs mál. Hann steig út úr bátnum, gekk í land, tæmdi blöðruna og gekk út í bát.
Bill Gates hélt lengst út, en samt kom röðin að honum. Hann ákvað að leika sama leikinn… og pompaði ofan í með stórri gusu.
Meðan Bill barðist um í vatninu, leit Steve á Linus og sagði: “Við hefðum kannske átt að segja honum frá stiklusteinunum.”
Linus deplaði augunum og spurði svo með undrunarsvip: “Hvaða stiklusteinum?”

BBC Reydarfjordur

25. ágúst 2010

Í hafnarmyndavél Fjarðabyggðar á Reyðarfirði má sjá þetta fraktskip þar sem það liggur með brotinn gír.